Су жаңа темір тұлпар 24 қазанда көпке таныстырылады деп жоспарланып отыр, ал әзірше өндіруші компания оның алғашқы ресми нобайларын жария етті. Бұрында жарияланған шпиондық фотосуреттерді есепке алғанда, сегізінші буындағы хэтчбектің дизайны жетілдірілген сыңайлы, тек шамдары жарықдиодты жолақпен біріккен. Сериялы көлікке үлкен дискілер орнатылады деп армандаудың қажеті жоқ, бұл суретшінің қиялы көрініс тапқан нобай.
Хэтчбектің салоны әлдеқайда авангардты болып шыққан. Аспаптар панелі мен мультимедиалық дисплей бірігіп, алдыңғы панельдің басым бөлігін алып тұрған үлкен экранға айналды. Физикалық батырмалары жоқтың қасы.
Жаңа «Гольфтің» сатылымы таныстырылым өтісімен, көп ұзамай-ақ басталады. Ең алдымен сатушылардың қолына бес есікті хэтчбек және универсал түседі, ал үш есікті нұсқасы тіпті болмайды екен.
1974 жылы жарық көрген Volkswagen Golf-тің қазіргі таңда бүкіл әлем бойынша 35 миллион данасы өз иесін тапты. Жетінші буыны 2012 жылдан бері шығарылып келеді және әлі күнге дейін Еуропадағы ең танымал жеңіл автокөлік болып табылады.
Комментариев: 0