Жаңа Toyota Hilux интерьері LC Prado стилінде болады

Жаңа Toyota Hilux интерьерінің біршама элементін мамандар қазіргі Land Cruiser Prado-дан (кей нарықта Land Cruiser 250 деп аталады) алған. Мұны жаңа өнімнің әлеуметтік желіде тараған патент суретінен білуге болады.

Жаңа Hilux салонының алдыңғы панеліндегі 12.3 дюймдік екі экран, климат-бақылау жүйесінің пульті, ортаңғы консоль және басқа бірқатар шешім бізге бұрыннан таныс.

Патент суретінен Hilux-тың сырт пішінін де көруге болады, ол Bestcarweb басылымының суретшілері ұсынған рендерге сәйкес келеді. Яғни пикаптың алдыңғы жағы жіңішке жарық техникасы, агрессивті бампер дизайны және шағын радиатор торы ерекше.

Bestcarweb ақпаратына сенсек, модельдің тоғызыншы буыны Land Cruiser 300 бен LC Prado-дан таныс GA-F платформасына негізделеді. Пикап 2.8 литрлік дизельді моторын сақтап қалады, бірақ 48 вольттық стартёр-генератор түріндегі электрлі қондырма алған. Күштік құрылым толық жетек жүйесі және 8 сатылы автоматпен жұмыс істейді. Prado да осындай агрегатпен жүреді.

Автомобиль 2026 жылы көктемде жарық көреді.