Жаңа Li i8 кроссоверінің жүріс қоры белгілі болды

Lixiang i8 индексті электрокроссоверінің жүріс қоры қанша болатынын жариялады. Қытайлық БАҚ хабарлағандай, жаңа өнім бұл көрсеткіш бойынша басты бәсекелесі электрлі Aito M9-дан асып түсті.

Марка Li i8-дің базалық нұсқасына 90.1 киловатт батарея орнатады, оның жүріс қоры 670 км. Мұндай кроссовердің салмағы — 2580 келі, оның 545 келісі аккумулятордың салмағы. Ал сыйымдылығы 97.8 кВт⋅сағ батареяның арқасында машина 720 км жүре алады. Мұндай батарея біріншісінен 20 келі ауыр.

Aito M9 EV 100 киловатт батареямен жабдықталған, бірақ жүріс қоры 630 км ғана. Lixiang i8 энергияны аз тұтынатындықтан (100 км-ге 13.4 кВт⋅сағ) осындай көрсеткішке жетіп отыр, марка ол үшін машинаның электроникасы мен аэродинамикасын жақсартқан. 800 вольттық архитектураның арқасында i8 батареясын 10 минутта 500 км жүруге жететіндей мөлшерде қуаттайды.

Li i8-дің өлшемі — 5085×1960×1740 мм, дөңгелек базасы — 3050 мм. Салоны үш қатарлы болады.

Марка электрокроссоверді бір ғана күштік құрылыммен ұсынып отыр, 544 ат күшін беретін агрегаттың арқасында машинаның ең жоғары жылдамдығы 180 км/сағ-қа жетеді. Электрокар биыл жаз ортасында саудаға шығады, бағасы 400 мың юаньнан (28 млн теңге) басталады.