Жаңа Lexus купесінің тұсаукесері биыл өте ме?

Жапонияның Bestcarweb басылымы 2010-2012 жылдары шектеулі тиражбен шыққан 10 цилиндрлі мотормен жүретін LFA купесінің ізбасары, екі есікті Lexus туралы инсайдерлік ақпарат жариялады.

Модель атауы қандай болатыны белгісіз. Оған әр кезде әртүрлі индекс беріліп жүр, соның бір — LFR. Бұл атау GR немесе Gazoo Racing суббрендімен байланысты болуы мүмкін деген мәлімет бар.

Жаңа модель LFA-ден үлкен (4600×1950×1200 мм) болады, ал дөңгелек базасы — 2700 мм. Дереккөз спорткардың шассиі алюминий қорытпасынан, шанақ панелі карбоннан жасалғанын хабарлады. Гибрид күштік құрылымы электромотор және 720 ат күшіне ие 4 литрлік V8-ден тұрады. Агрегат жалпы 900 күш береді. Машина LFA сияқты артқы жетекті болады.

Марка жаңа өнім мен GT3 трек болидін қатар әзірлеп, екеуін бір уақытта нарыққа шығарады. Олар биыл күзде жарық көруі мүмкін.

Купе 30 млн иен (195 мың АҚШ доллары) тұрады, яғни ол кезіндегі LFA-ден айтарлықтай арзан. Жаңа Lexus-тің тиражы клиенттердің тапсырысына байланысты болады.