Kia K4 топтамасы үшінші түрленіммен толықты. Седан мен хетч қатарына универсал қосылды. Мұндай K4-тің ұзындығы 4695 мм болады, яғни ол хетчбектен 265 мм ұзын. Бұған жүксалғышының ұлғайғаны әсер етіп отыр, өйткені дөңгелек базасы өзгеріссіз қалды (2720 мм).
5 орынды Kia K4 Sportswagon-ға 604 литр жүк сыяды. Екінші қатар орындығын жатқызса, жүксалғыш көлемі 1439 литрге жетеді. Гибрид нұсқада батарея кеңістіктің бір бөлігін алып, жүк сыйымдылығы 482 және 1317 литрге төмендейді.
Универсалдың салоны K4-тің өзге нұсқаларымен бірдей, алдыңғы панельде үш экран бар: 12.3 дюймдік аспаптар панелі мен медиакешен және олардың арасында орналасқан 5.3 дюймдік климат-бақылау дисплейі.
Модельдің базалық күштік құрылымы 115 ат күшіне ие 1.0 литрлік 3 цилиндрлі турбомотордан тұрады, ол 6 сатылы механика қораппен жұмыс істейді. Одан бір саты жоғары нұсқа — стартер-генератор және опция түріндегі 7 сатылы робот қорабы бар гибрид. Ал үздік түрленімі 150 немесе 180 ат күшін беретін 1.6 литрлік қозғалтқышпен жабдықталады. Ол да робот қораппен жұмыс істейді. Болашақта модельдің қосылатын гибрид түрленімі жарық көреді.
Kia K4 Sportswagon тек Еуропада сатылады деген ақпарат бар. Бірақ машина Мексикада жасалады.
Комментариев: 0