Жаңа Hyundai Santa Fe робот орнына автомат қорап алады

2023 жылдың жазында жарық көрген Hyundai Santa Fe-нің бесінші буыны рестайлингтен өтеді. Модельдегі өзгеріс туралы ақпарат аз болғанымен, америкалық MotorTrend басылымының арқасында кем дегенде бір маңызды мәлімет белгілі болды. Турбомоторы бар 2.5 литрлік Santa Fe қосарлы іліністі 8 сатылы робот орнына дәл сондай диапазондағы классикалық автоматпен жабдықталады.

Компания өкілдерінің айтуынша жаңа трансмиссия машинаның басқарылуын жақсартады. Дегенмен мұның себебі әлдеқайда қарапайым. Қазіргі робот қорап АҚШ-та кепілдік бойынша жиі жөндеуден өтеді, сол үшін бренд сервистік кампания жариялаған. Бағдарламалық жасақтамадағы ақауға байланысты робот іліністі өздігінен қосады. Қораптың селекторы паркинг күйінде тұрса да, кроссовер қозғалысын жалғастырады.

KoreanCarBlog мәліметінше автомобиль жаңа жарық техникасын алады. Артында тік стоп-сигнал және жүксалғыш есігін бойлай орналасқан көлденең жарықдиодты жолақ болады. Нөмірге арналған орын бамперден жүксалғыш қақпағына қарай ауысады.

Hyundai рестайлинг Santa Fe-ні 2026 жылдың аяғында немесе 2027 жылдың басында көрсетеді.

Бесінші буындағы Santa Fe Қазақстанда да сатылады. Бізде ол 194 ат күшіне ие атмосфералы 2.5 литрлік қозғалтқышпен және 8 сатылы автоматпен жүреді. Caligraphy нұсқасына 281 ат күшін беретін турбомотор орнатылған. Соңғысы 8 сатылы роботпен жұптаса жұмыс істейді. Жеңілдіктер мен арнайы ұсыныстарды есептемегенде бағасы 21.2-29.5 млн теңге аралығында.