Жаңа Geely Emgrand үлкен әрі қуатты болады

Geely жаңа, бесінші буындағы Emgrand-тың ресми фотосын жариялады. Седанның сырт пішіні өзгеріп, ірілене түсті, мотор гаммасына турбоүрлемді агрегат қосылды. Бағасы белгісіз, ал қазіргі буыны Қытайда 68 900–86 900 юань (5.2–6.6 млн теңге) тұрады.

Geely Emgrand-тың экстерьері тік ламельді ірі радиатор торы, Т пішінді қосымшасы бар бампер және жаңа жарық техникасының арқасында марканың жаңа өнімдеріне ұқсайды. Жіңішке басты оптиканың жарығы 170 метрге түседі, ал шамның сигналы 300 метр қашықтан көрінеді. Артқы жағында спойлер тұр. Дөңгелек дискісі мен шанақ түстері көбейді.

1 / 5

• 
• 
• 
• 
• 

1 / 5

Седанның өлшемі — 4815×1885×1480 мм, дөңгелек базасы — 2755 мм. Демек Emgrand қазіргі буынынан үлкен. Қазір Қазақстанда сатылып жатқан модельдің өлшемі — 4638×1822×1460 мм, ал дөңгелек базасы — 2650 мм. Emgrand-тың салоны біршама кең болатыны анық. Geely интерьердің суретін әлі жариялаған жоқ.

Жаңа буынның базалық нұсқасы 120 ат күшіне ие 1.5 литрлік атмосфералы моторын сақтап қалды. Мұндай қозғалтқышпен жүретін Emgrand-тың жылдамдығы 170 шақырымнан аспайды. Қымбатырақ нұсқасы 7 сатылы роботпен жұмыс істейтін 181 ат күшіне ие (290 Нм) 1.5 литрлік турбомотормен жүреді. Мұндай машина алғашқы жүздікті 7.9 секундта еңсереді, ең жоғары жылдамдығы — 200 км/сағ.

Қазақстанда Geely Emgrand 122 ат күшіне ие мотор көмегімен қозғалады, агрегат 5 сатылы механика немесе 6 диапазонды автоматпен жұмыс істейді. Биыл шыққан машинаны дилерлер 10.3–12.4 млн теңгеге сатып жатыр.