Жаңа AUDI қытайлардың көңілінен шықпады

Былтыр Audi Қытайға арналған суббрендін таныстырған. Атауы бұрынғыдай болғанмен, жазылуы (AUDI) басқаша. SAIC Motor-дың технологияларын алған және жергілікті нарық пен тұтынушылардың талғамына сай келетін модель жақсы өтуі керек еді. Дегенмен нәтиже ойдағыдай шықпады. Алғашқы 30 минутта 10 000 алдын ала тапсырыс түсіп, жыл көлігі атағын алса да, жоспар орындалмады.

Car News China хабарлағандай, 2025 жылдың қорытындысы бойынша батареялы AUDI E5 Sportback-тің 7070 данасы өткен, ал биыл қаңтарда 420 машина өз иесін тапты.

Марка бұл мәселені жеңілдік ұсыну арқылы шешпекші. 776 ат күшіне ие электромобильдің бағасы 30 000 юаньға (2.2 млн теңге) төмендеді. Енді E5-тің құны 205 900 юаньнан (15 млн теңге) басталады.

Компания топтамадағы екінші өнімге үміт артып отыр. 2026 жылдың алғашқы жартысында 5 метрлік E7X кроссовері жарық көреді.