Әлеуметтік желіні шарлап жүрген бейнежазбаның кадрларынан жол-патрульдік полиция киімін киген қос тәртіп сақшысының ашық алаңда өзара кім мықтыны анықтап жатқанын байқауға болады. Ал тағы үшеуі бұл жанжалды сырттай бақылап тұр. Төбелес аяқталысымен әлгілердің бәрі жақын маңда тұрған қызметтік көліктерге қарай бағыт алады.
«Мұндай әрекеттер біздің қызметке әр бермейді. Полицейлер арасындағы төбелес көрсетілген мына бейнежазба бойынша қызметтік тексеріс тағайындалды. Қызметкерлер мен мұндай жағдайдың болуына жол берген басшыларға заңға сәйкес шара қолданылатын болады. Тексеріс нәтижесін халыққа хабарлаймыз», — деп ҚР ІІМ Ішкі және сыртқы коммуникациялар департаментінің директоры Алмас Сәдубаев мәлімдеді.
Астана қалалық Полиция департаментінің баспасөз қызметі жуырда хабарлағандай, жанжалға қатысқан бес адамның барлығы, нақтырақ айтсақ екі учаскелік инспектор мен жол-патрульдік полициясының үш қызметкері жұмыстан қуылды. Олардың басшылары да жазадан құтылған жоқ. Рота командирі лауазымынан айырылып, оның басшылары қатаң тәртіптік жауапкершілікке тартылды.
Комментариев: 0