Zeekr 9X — брендтің алғашқы гибриді

Zeekr флагман моделін таныстыруға дайындалып жатыр. Марка 9X Grand атауын алған машинаның бірнеше фотосын жариялады.

Суреттегі Zeekr 9X Grand камуфляжбен қапталған, десе де дизайнынан еуропалық модельдерге тән элементтер байқалады. Сырттай Range Rover не Rolls-Royce Cullinan-ды еске салады, алдыңғы бөлігін Zeekr 009 вэніне ұқсатып, ірі радиатор торымен әрлепті. Шатыры мен алдыңғы әйнегі түйіскен жерде екі қабатты жарық техникасы мен лидар орналасқан.

Бренд Zeekr 9X Grand-пен бірге Super Hybrid деп аталатын алғашқы гибрид жүйесін де көрсетеді деген сыбыс бар. Компания өкілдері оның конструкциясы электрлі күштік құрылымдар мен түрлі типті гибридтің ең жақсы қасиеттерін үйлестіреді деп мәлімдеген, бірақ әлі нақты мәлімет бермеді.

Бренд автомобильді сәуірде Шанхайда өтетін көрмеде ел назарына ұсынады, оған дейін біраз ақпарат беруі де мүмкін. Zeekr флагманды III тоқсанда сата бастайды. Жоспар бойынша биыл тағы бір гибрид кроссовер шығуы керек, бірақ ол кішірек болады.