Zeekr 001-ді сервиске шақырады

Кампанияға 2021 жылдың шілдесі мен 2024 жылдың наурызы аралығында шыққан 38 мыңнан астам көлік қатысады.

Sunwoda компаниясы жасаған 86 кВт·сағ аккумуляторда ақау бар. Батареядағы компонентте кедергі артып, тиімділігі төмендейді және жолда қауіпті жағдайға әкелуі мүмкін.

CarNewsChina дерегінше шара 2021–2024 жылдар аралығында сатылған модельдің жалпы тиражының шамамен 22.5 %-ын қамтиды.

Zeekr Қытайда 001-дің иелерін биыл наурызда қабылдайды. Компания аккумуляторды тексеріп, қажет болса, тегін ауыстырады.

Кампанияның Қазақстандағы көліктерге қатысы бар ма?

Машинаны ресми дилерден алғандарға алаңдаудың қажеті жоқ. Еліміздегі автосалондар оның 100 киловаттық аккумулятормен жабдықталатын жаһандық нұсқасын сатады. Дистрибьютор өкілдері бұл батареяны CATL жеткізген және біздегі көліктерге қатер төніп тұрған жоқ деді.

Zeekr 001-ді Қазақстанға жеке импорттаушылар да әкелген. «Сұр» автомобильдер, яғни рестайлингке дейінгі We нұсқасы сервистік науқанға қатысуы мүмкін.