13 қыркүйекте түнгі уақытта Қарасай ауданындағы полиция бөлімшесіне Қайнар ауылында Toyota Camry ұрланғаны туралы хабар түседі. Алматы облысының тәртіп сақшылары қаскөйді Алматы — Бішкек тас жолынан анықтап, ізіне түседі.
Қылмыскер полицейлердің талабын орындаудан бас тартады. Жүргізуші қауіпті маневр жасап, жолдың қарсы бетіне шығып кетеді және полицейді қағып өтпек болады. Жүк көлігін басып озам деп рөлге ие бола алмай қалған жүргізуші соғылып барып тоқтайды. Тәртіп сақшыларының талабын да, ауаға атылған оқты да елемеген азаматты машинадан күштеп шығаруға тура келді.
Кейін белгілі болғандай, сол сәтте Toyota Camry рөлінде Жамбыл ауданына қарасты Ұзынағаш ауылының 28 жастағы тұрғыны отырыпты. Ер адам бұрын да сотты болған. Көлікте 30 жастағы қала тұрғыны да отырған. Нәзік жандының айтуынша, ол машинаның ұрланғанын білмепті, қуғын басталғанда көлікті тоқтатуды сұраған, бірақ жүргізуші сөзіне құлақ аспапты.
Бөтеннің мүлкіне қол салған азамат көлік ұрлағаны үшін ғана емес, жол ережесін бұзғаны, қарсылық көрсеткені және полиция қызметкерінің өміріне қауіп төндіргені үшін де жазаға тартылады.
Комментариев: 0