BYD ішкі нарықта YangWang U9 электрлі гиперкарына алдын ала тапсырыс қабылдай бастады. Купе 1 680 000 юаньға (230 мың доллар) бағаланды, құнына керемет динамикасы мен жақсарған аспасы да әсер еткен.
Өлшемдері — 4966×2029×1295 мм, дөңгелек базасы — 2.9 метр. Жаңа өнімнің салмағы — 2475 келі, бұл осы кластағы автомобиль үшін аз емес. BYD көлік алғашқы жүздікті небәрі 2.36 секундта алады деп есептейді. Машина 1305 ат күшіне ие (1680 Нм) төрт электрлі қозғалтқышпен жүреді. Сынақтарда автомобильдің максимал жылдамдығы 309 км/сағ-қа жетті, ал классикалық драг-стриптің 402 метрін 9.78 секундта жүріп өтті.
YangWang U9 қарапайым 80 кВт⋅сағ литий-темір фосфатты батареямен жабдықталды, қуаттаусыз 465 шақырым жүре алады. 30-дан 80%-ға дейін қуаттауға 10 минут кетеді.
Гиперкардың DiSus X аталатын белсенді аспасы төрт дөңгелектің әрқайсысында амортизаторды жеке реттеуге қабілетті. Дөңгелекті көтеру немесе түсіру жылдамдығы — секундына 500 мм. Жүйенің жұмысы туралы бейнеролик Қытайдың әлеуметтік желісінде тарап жатыр. Шанағы шайқалған электромобиль билеп жатқандай көрінеді.
Мұндай баға үшін U9 салоны тым ұстамды болып көрінетін шығар, бірақ бұл саналы шешім болуы мүмкін, себебі жүргізушіні ешнәрсе алаңдатпайды. Купе жүргізуші мен жолаушыға арналған екі көлденең 10.25 дюймдік дисплеймен және ортаңғы консольдегі 12.3 дюймдік тік экранмен жабдықталды.
Басқа опцияларға жартылай автономды лидарсыз басқару жүйесі (автоматты тұраққа қою мүмкіндігі сақталған), «танк секілді кері бұрылу», 21 дюймдік дөңгелектер және 280 кг қысу күшін қосатын антиқанат кіреді. Автомобиль саудаға шығатын күн әлі жарияланбады. Бұл жылдың ортасында болады деп күтілуде. Алдын ала тапсырыс қайтарымсыз депозитпен (300 мың юань) қабылданады. Мұндай ақшаға Қытайда класы жоғары электромобиль аласыз.
YangWang U9 премиум суббрендтің жол талғамайтын U8-ден кейінгі моделі болды. Жақын арада оған U7 седаны қосылады, ал төртінші YangWang спорттық кроссовер болады.
Комментариев: 0