Yamaha Toyota-ға арнап сутекті V8 жасады

Өткен аптада жапониялық Best Car журналы Toyota сутек арқылы жұмыс істейтін V8 моторын дайындап жатқанын хабарлады. Басылым авторлары жаңа мотор Toyota Land Cruiser 300-ге қойылуы мүмкін екенін жазған. Енді сол ақпарат растала бастады.

Yamaha Motor компаниясы Toyota-ға арнап сутекті V8 жасайтынын хабарлады. Түрленген агрегат Lexus RC-F-тің «сегіздігіне» негізделеді. Бес литрлік 2UR-GSE моторына цилиндр бастиегі, енгізу коллекторы, инжектор және т. б. орнатылды. Енді қозғалтқыш 455 ат күші мен 540 Нм момент береді. V8-дің бензинді нұсқасы бұдан сәл қуатты — 477 күш пен 535 Нм.

Yamaha компаниясының атқарушы директоры Ёсихиро Хидаканың айтуынша, сутекті мотор дәстүрлі ІЖҚ-ның негізгі ерекшеліктерін (мысалы, дыбысы) сақтай отырып, көміртекті бейтараптыққа қол жеткізуге мүмкіндік береді.

Yamaha Motor сутек арқылы жұмыс істейтін мотор жасауды бес жыл бұрын бастаған екен. Инженерлер мұндай күштік құрылымды автокөлікке ғана емес, мотоциклге де орнатуға болады деп санайды. Yamaha оны екі дөңгелекті техникаға қою үшін Kawasaki-мен бірге жұмыс істейді.