Xiaomi YU7 кроссоверінің үш нұсқасын көрсетті

Компания Tesla Model Y-дың бәсекелесі болатын YU7 кроссоверін таныстырды. Электрокар бірнеше күштік құрылым алады. Ұзаққа шабатын нұсқасы 835 шақырым жүреді және алғашқы жүздікті 3.23 секундта еңсереді. Компания басшысы Лэй Цзюнь презентация кезінде бағасын жариялауы керек еді, бірақ құны шілдеде саудаға шыққанда белгілі болады.

Өлшемдері 4999×1996×1600 мм, дөңгелек базасы 3 метр болатын автомобиль Tesla Model Y-дан үлкенірек. Жүксалғыш көлемі — 678-1758 литр, оған қоса капот астында қосымша орын (141 литр) бар. Аспасы бейімді амортизаторлармен және клиренсін өзгертуге мүмкіндік беретін пневмоэлементтермен жабдықталған. Максимал жол саңылауы — 222 мм.

YU7-нің базалық нұсқасына 320 ат күшін (528 Нм) беретін бір электромотор және 96.3 кВт⋅сағ литий-темір-фосфатты батарея орнатылады. CLTC циклі бойынша 835 шақырым жүретін бұл көлік топтамадағы жүріс қоры ұзаққа жететін модельге айналды. Ол алғашқы жүздікті 5.88 секундта жүріп өтеді, ең жоғары жылдамдығы — 240 км/сағ. YU7 Pro да осындай батареямен жабдықталады, бірақ жалпы қуаты 496 ат күшіне (690 Нм) тең екі электромотормен жүреді. Нәтижесінде алғашқы жүздікті 4.27 секундта еңсеріп, жүріс қоры 770 км-ге жетеді.

1 / 12

• 
• 
• 
• 
• 
• 
• 
• 
• 
• 
• 
• 

1 / 12

Үздік YU7 Max модификациясы 101.7 кВт⋅сағ никель-марганец-кобальт аккумулятормен және 691 ат күшіне ие (866 Нм) моторымен ерекшеленеді. Электромобиль жүзге дейін 3.23 секундта жылдамдық алады, максимал жылдамдығы — 253 км/сағ. Алайда ол 760 шақырым ғана жүреді.

Лэй Цзюнь YU7 динамика жағынан Model Y-мен шамалас болса да, тұтынушы үшін әлдеқайда маңызды параметр — жүріс қоры бойынша америкалық бәсекелесін артта қалдырады деді. Xiaomi кроссовері әлдеқайда жылдам қуатталады: 620 км-ге жететін жүріс қорын 15 минутта жинайды.

YU7-нің сырт келбеті SU7 седанына ұқсайды, бірақ мамандар аэродинамикалық сипаттамасына көңіл бөлген. Аэродинамикалық кедергі коэффициенті — 0.245.

Интерьер архитектурасы да жақсарған. HyperVision проекциялық дисплейі бірден көзге түседі. Ол алдыңғы әйнектің төменгі бөлігінде орналасқан, ұзындығы 1.1 метр және күштік құрылымның көрсеткіштері, навигация мен медиаконтент сияқты деректерді көрсетеді. Дисплей аспаптар панелінің қызметін атқарады, бірақ жолаушыға арналған экран ретінде де пайдалануға болады. Орталық сенсорлы экранның өлшемі — 16.1 дюйм.

1 / 7

• 
• 
• 
• 
• 
• 
• 

1 / 7

Наппа былғарысымен қапталған орындықтар жылыту, желдету және массаж функцияларымен жабдықталады. Алдыңғы орындықтарды жатқызып, демалатын орынға айналдыруға болады, артқы орындықтардың арқалығы 135 градусқа шалқаяды. Артқы жолаушылар үшін жеке медиаэкрандар мен қосымша функцияларды басқаруға арналған сенсорлы панель бар.

YU7 жаңа Nvidia чипіне негізделген жүргізуші ассистенттерінің кешенін алады. Xiaomi бұны нарықтағы ең қуатты құрылғы деп отыр. Ол лидар, 12 радар және аса тұнық 11 камера көмегімен жұмыс істейді.

1 / 4

• 
• 
• 
• 

1 / 4

Бұған дейін базалық YU7-нің құны 199 мың юаньнан (14 млн теңгеге жуық) басталады деген сыбыс тараған еді, бірақ Xiaomi бұл ақпаратты жоққа шығарды. Жаңа бейресми мәліметтерге сәйкес бастапқы бағасы 300 мың юаньды (21 млн теңгеге жуық) құрайды.