Xiaomi SU7 Ultra Шанхайда рекорд жасады

Компания SU7 Ultra электромобилінің Шанхайдағы автодромдағы видеосын жариялады. Төрт есікті көлік осы жерде рекорд орнатқан Porsche Taycan Turbo GT көрсеткішінен асып түсті. Неміс компаниясы өз рекордын былтыр қазанда жариялады. SU7 Ultra Taycan-ды шамамен 1.5 секундқа артта қалдырды, бірақ мұнымен шектелмейтін сияқты.

Седан ұзындығы 5.4 шақырым болатын тректі 2 минут 09.94 секундта жүріп өтті, ал неміс электрокары 2 минут 11.28 секунд жұмсады. Taycan трассаның ең ұзын түзу бөлігінде жылдамдықты 300 км/сағ-қа жеткізсе, SU7 Ultra-ның жылдамдығы 323 км/сағ болды.

Xiaomi мұндай жетістікке қуатының арқасында жетті. Porsche электромобилінің Turbo GT нұсқасына жалпы қуаты 1109 ат күшіне тең қозғалтқыштар орнатса, SU7 Ultra-ның моторлары 1548 ат күшін береді. Екі электрокардың жүріс бөлігі ұқсас және жарысқа арналған.

Қытай көлігі одан жақсы нәтиже көрсететін еді. Себебі Porsche-нің Шанхайдағы рекордын кәсіби тест-пилот Ларс Керн орнатса, SU7 Ultra-ны құрастырушы инженерлердің бірі басқарған. «Нюрбургрингтегі» жарыстан айырмашылығы, Шанхайдағы автодромда жақында саудаға шығатын стандарт электромобиль болды.

Бренд SU7 Ultra-ны Қытайда 27 ақпанда тікелей саудаға шығаруды жоспарлап отыр. Алдын ала тапсырыс қабылдау басталғанда бағасы 814 900 юань (шамамен 56 млн теңге) болады, бұл Қытайдағы Porsche Taycan Turbo GT-дің бастапқы бағасынан екі есе арзан.