Xiaomi SU7 Ultra арзандады

Бренд Қытайда электрлі суперседанның саудасын бастады. Алдын ала тапсырыс қабылдау барысында бастапқы бағасы 814 900 юань (шамамен 56 млн теңге) болған еді, бірақ қазір бағасы 529 900 юаньға (36.5 млн теңге) түсті. Xiaomi клиенттеріне жалпы қуаты 1548 ат күшін құрайтын үш моторлы көлікті сәуірде жеткізе бастайды.

Xiaomi SU7 Ultra — қарапайым SU7-нің қуатты нұсқасы, басты ерекшелігі — үш моторлы күштік құрылым. Онымен седан алғашқы жүздікті 2 секундтан аз уақытта еңсереді және ең жоғары жылдамдығы сағатына 350 км-ге жетеді. Жүріс қоры — 630 км. Ultra клиренсін өзгертуге мүмкіндік беретін бейімді пневмоаспамен және 285 кг қысым күшін қамтамасыз ететін аэродинамикалық пакетпен жабдықталған.

Седанға 21 дюймдік дөңгелектер және алдыңғы осінде 6 поршенді Akebono суппорттары бар 430 миллиметрлік тежеуіш дискілері орнатылған. Электрокарға 100 км/сағ жылдамдықта тоқтау үшін 30 метр қажет.

SU7 Ultra-ның спорттық орындықтары бар салоны көміртекті пластик және алькантарамен қапталған. Алдыңғы орындықтарда 10 нүктелі массаж функциясы болады. Базалық жинаққа 25 динамик және үш лидар кіреді.

Xiaomi SU7 Ultra Шанхайдағы автодромда рекорд орнатып, төрт есе қымбат Porsche Taycan Turbo GT-ді басып озды. Прототип «Нюрбургринг» трассасында ең жылдам төрт есікті көлік атанды.

Компания биыл 10 мың SU7 Ultra сатпақ болған, бірақ машина саудаға шыққаннан кейін бұл көрсеткішке екі сағатта жетті. Xiaomi жылдық өндіріс көлемін 300 мың автомобильге дейін жеткізуді көздеп отыр, оған биыл жазда жарық көретін YU7 кроссовері көмектесуге тиіс.