Xiaomi бір жылға толмайтын уақытта 200 мың SU7 электроседанын сатты, мерейтойлық машина жақында иесін тапты. Оның үстіне электрокар алғысы келетіндер аз емес, кезек көбейіп кеткен. Компания жылдық сауда жоспарын 300 мыңнан 350 мыңға көбейткенін хабарлады, бұл 2024 жылғы көрсеткіштен екі есеге жуық көп. Бейжіңдегі зауытының екінші алаңы биыл жазда жұмыс бастайды.
Xiaomi былтыр көктемде зауыт жұмысын бір ауысымнан екі ауысымға көшіріп, өндіріс қуатын арттырған. Сонда да нарық сұранысын толық қанағаттандыра алмай отыр. Жергілікті БАҚ хабарлағандай, SU7-нің базалық нұсқасын алу үшін 10 ай күту керек, ал Pro комплектациясын алдағы бір жыл бойы ала алмайсыз.
Xiaomi басшысы Лэй Цзюнь өндіріс көлемін арттыру процесі жоспарға сай жүріп жатқанын айтты. Ол нақты жоспарын жариялаған жоқ, бірақ Bloomberg дереккөзі зауыттың екінші кезегі ұлғаятынын хабарлады. Былтыр зауыт аумағы 53 гектар болған, енді жергілікті билік концернге тағы дәл сондай көлемде жер береді екен.
Жаңа конвейерге YU7 кроссовері тұрады деген болжам бар. Седан мен кроссовер қатар шығуы да мүмкін. Xiaomi электрокарларын шетелге шығаруға дайындалып жатыр, экспорт 2027 жылы басталады. Демек компания өндіріс көлемін тағы арттыруға мәжбүр болады. Мұндай сәтті сауда Xiaomi-ге пайда табуға көмектесетін шығар. Кейбір басылым компания әлі әр автомобильге 40 мың юаньға дейін (2.8 млн теңге) шығындалып отырғанын есептеген.
Комментариев: 0