Xiaomi-дің алғашқы кроссоверінің бағасы белгілі болды

Xiaomi Қытайда алғашқы кроссоверінің бағасын жариялады. Xiaomi YU7 үш түрлі жинақпен шығады, олардың ішінде тек базалық нұсқасы моножетекті. Жаңа электрокардың бағасы 253 000-329 900 юань (18.3–23.8 млн теңге) аралығында. Бастапқы құны басты бәсекелесі Tesla Model Y-дан 10 мың юань (723 мың теңге) арзан.

Базалық модификация артқы осінде орналасқан 320 ат күшіне ие (528 Нм) бір электромотормен жүреді. Мұндай электромобиль алғашқы жүздікті 5.88 секундта еңсереді. Сыйымдылығы үлкен батарея (96.3 кВт·сағ) мен жалғыз қозғалтқыштың арқасында жүріс қоры 830 шақырымға жетеді.

1 / 8

• 
• 
• 
• 
• 
• 
• 
• 

1 / 8

Орташа нұсқаның алдыңғы осіне қосымша мотор жайғасып, қуаты 496 ат күшін құрайды, жүріс қоры 770 шақырымға қысқарады. Ең қымбат түрленім 690 ат күшін және 866 Нм момент беретін екі қозғалтқышпен, 101.7 кВт·сағ аккумулятормен жабдықталады. Мұндай YU7 алғашқы жүздікті 3.23 секундта еңсереді, қайта қуаттаусыз 760 шақырым жүре алады. Батареяны 10 %-дан 80 %-ға дейін қуаттауға небәрі 12 минут кетеді.

Кроссоверге тапсырыс беру үшін 5000-20 000 юань (360 мың — 1.45 млн теңге) депозит қажет. Алғаш саудаға шыққанда Xiaomi кейбір қосымша опцияны тегін ұсынады. Мысалы, өте жайлы орындықтар, наппа былғарысымен қапталған салон және карбоннан жасалған аэродинамикалық бодикит. Кейін бұлар үшін ақы төлеуге тура келеді.

Электрокар комплектациясына қарай 19-21 дюймдік дискілер, 16.1 дюймдік сенсорлы экраннан тұратын мультимедиа жүйесі, алдыңғы әйнекті бойлай орналасқан және аспаптар панелінің орнын басқан проекция, 14-25 динамик, тоңазытқыш және есептеу қуаты 700 TOPS болатын Nvidia Thor чипіне негізделген жүргізуші ассистентерінің жүйесімен жабдықталады.