Handelsblatt өз дереккөзіне сілтеме жасай отырып, Volkswagen концерні Қытайдағы кәсіпорындарының бірін жабатынын хабарлады. Атап айтқанда, VW Passat пен Škoda Superb моделін шығаратын Нанкиндегі зауыт жұмысын тоқтатады. Volkswagen тарихта алғаш рет Қытайдағы зауытын жауып отыр.
Зауыт 2008 жылдан бері жұмыс істеп тұр, онда жылына 360 мың автомобиль шығады. Дереккөз бұл шешімінің Қытай нарығындағы қазіргі жағдаймен тікелей байланысы жоқ екенін айтты.
Volkswagen жергілікті модельдік топтамасын электр жетекке ауыстыруды жоспарлап отыр. Шанхай автосалонында бірнеше концептісін таныстырды. Жаңа модельдерді сериялы өндіріске шығару үшін зауыттарды жаңартып, қайта жабдықтау қажет. Ал Нанкиндегі зауытты жаңарту тым қиын әрі қымбатқа түседі. Себебі бұл өндіріс орны тым тар аумақта орналасқан, онда құрылыс жұмысын жүргізу өте қиын.
Volkswagen бұл әрекетін Қытайдағы өндірісті қысқарту емес, оңтайландыру деп есептейді. Бұған дейін Нанкинде шыққан модельдерді 70 км қашықтықтағы басқа зауыт құрастырады. Зауыт 2025 жылдың екінші жартысында толық жабылып, өндіріс орны жергілікті билікке беріледі. Бұл аумақта тұрғын үй кешені мен саябақ салынады деген ақпарат бар. Бірақ басылым бұл жағдайды шетелдік және жергілікті автоөндірушілердің Қытай нарығында белгілі проблемаға тап болғанының көрінісі деп санайды.
Комментариев: 0