Volkswagen көліктері Өзбекстанда жасалады

Gazeta.uz хабарлағандай, Volkswagen Өзбекстанда ірі торапты өндірісті іске қосу туралы келісімшартқа «Узавтосаноаттың» еншілес компаниясы Alyans Auto-мен бірлесе отырып қол қойды.

Концерн басшылары халықтың табысы артып келе жатқандықтан Өзбекстан автомобиль нарығын үлкен өзгеріс күтіп тұр дейді. Бұл неміс көліктерінің саудасына жол ашады. Концерннің Қытайдағы өндірістік базасы жақын болғандықтан логистика шығыны және шығарынды көлемі айтарлықтай азаяды.

Volkswagen Passenger Cars бөлімінің сату, маркетинг және қызмет көрсету жөніндегі басқарма мүшесі Мартин Сандер LinkedIn парақшасында бренд Өзбекстандағы тұтынушыларға қарай бейімделгенін айтып, топтамада сегіз сәнді седан мен кең кроссоверлер болады деді. Ол нақты модельдерді атамады, бірақ Volkswagen-нің Қытайға арналған көліктері екені анық.

Сериялық өндіріс биыл төртінші тоқсанда басталады.

Volkswagen бұған дейін Өзбекстанда орнығуға тырысқан. Кәсіпорын 2020 жылы елде коммерциялық техника, нақтырақ айтқанда жүк және жолаушы таситын Caddy-ді құрастыра бастады. Кейін Škoda-ның Kodiaq моделі де саудаланды. Бірақ 2022 жылы Ресей мен Украина арасында соғыс басталып, жоба тоқтап қалды. Санкция салдарынан компания Ресейден кетіп, Өзбекстандағы зауыт қосалқы бөлшексіз қалды.

Volkswagen қайта оралады деген ақпарат алғаш 2023 жылы жазда тараған. Жоспар бойынша неміс брендінің электрлі және гибрид автомобильдерін Жизақтағы зауыт шығаруы керек еді.