Volkswagen көлік қуатын арттыру үшін ақы алады

Volkswagen-нің Ұлыбританияда тұратын болашақ клиенттері бірнеше батырманы басу арқылы темір тұлпарына қуат қосады. Автоөндіруші ID. 3 Pro және Pro S модельдеріне арнап мотор қуатын 201 ат күшінен 228-ге дейін арттыратын опция жасады. Оны пайдалану үшін ақша төлеу қажет.

Autoexpress бұған қызыққандар концернге ай сайын 16.5 фунт (12 мың теңге) санап береді деп жазды. Жылдық жоспар алғысы келген кісі 165 фунт (120 мың теңге) жұмсайды. Пакетті толығымен алуға да болады, оның құны — 649 фунт (474 мың теңгеге жуық). Бір ай тегін қолданады.

Volkswagen мұндай сервисті ойлап тапқан алғашқы өндіруші емес. Бірнеше жыл бұрын BMW орындық жылыту үшін ақша сұраған. 2023 жылы күзде неміс бренді бұл сәтсіз идея екенін мойындады. Mercedes-Benz те қалыс қалмай, EQE иелеріне 61 ат күшін ай сайын 60 долларға (32.3 мың теңге) сатып отыр. Ал 88 күш қосуды қаласа, 90 доллар (48.5 мың теңге) төлейді. Қытайдың Nio маркасы осыған ұсқас тәсілмен «автопилотын» саудаласа, Audi екі аймақты климат-бақылау үшін абоненттік төлем талап етеді.