Handelsblatt бірнеше инсайдерге сілтеме жасап хабарлағандай, Volkswagen концерні және оған кіретін Audi 2033 жылы толық электрлі топтамаға көшу жоспарын белгісіз мерзімге шегеруді ойластырып отыр.
Бұған былтыр электромобиль саудасы төмендегені (VW — 2.7 %, Audi — 7.8 %) себеп болды. Шығынды өтеу үшін екі бренд те сұйық отын тұтынатын модельдерді жаңартуға көбірек қаражат бөлуді жоспарлап, олардың өмірін ұзартады.
Компания басшылары стратегияны қайта қарау туралы соңғы шешімді наурызда қабылдауды жоспарлап отыр деп жазды басылым. Осыдан кейін VW Group құрамындағы Škoda мен SEAT/Cupra сияқты басқа брендтер жоспарларын қайта қарауға мәжбүр болады. Porsche мен Bentley премиум брендтері жаппай электрге көшуге асығып отырған жоқ. Bentley алғашқы электрлі көлігін 2026 жылы көрсетеді, ал Porsche іштен жанатын қозғалтқыштан арылуды мүлдем ойламайды.
Еуроодақтың экологиялық талапты кезең-кезеңмен күшейтуі Еуропа автоконцерндерін электромобильді жедел әзірлеуге және өндірісін ұлғайтуға итермеледі. Осыған байланысты 2035 жылдан бастап Еуропа автосалондарында тек шығарынды деңгейі төмен көліктер сатылады. Бұған электрокар мен сутекті машинадан бөлек, іштен жанатын қозғалтқышы бар, бірақ тек синтетикалық отын тұтынатын автомобильдер де кіреді. Бірақ мұндай отын әзірге өнеркәсіптік деңгейге шықпады.
Комментариев: 0