Вариаторы бар Lada Vesta саудаға шықты

АВТОВАЗ Ресейде Lada Vesta-ның 1.8 литрлік жаңарған қозғалтқышы мен вариаторы бар көптен күткен нұсқасын сата бастады. Брендтің ресми сайтында жарияланған прайс-листтен мұндай күштік құрылым «Вестаның» барлық нұсқасында болатынын көруге болады. Екі педальді модельдің динамикасы мен отын тұтыну мөлшері туралы ақпарат жарияланды.

CVT-мен жұптасқан қуатты мотор үшін өндіруші комплектацияға қарамастан қосымша 75 мың рубль сұрап отыр. Осылайша вариаторы бар ең арзан Lada Vesta — Comfort’24 комлектациясындағы седан, ол үшін 1 588 900 рубль (7.84 млн теңге) сұрап отыр, ал ең қымбаты — 2 127 900 рубль (10.5 млн теңге) тұратын үздік Techno’24 нұсқасындағы кросс-универсал.

АВТОВАЗ жақсарған қозғалтқышты 1.8 Evo деп атады. Ол ойықсыз поршеньдермен, өзгерген отын бүрку жүйесімен және оңтайланған табандықпен ерекшеленеді. Инженерлер қозғалтқыш құрылымын біршама өзгертті. Мотор 122 ат күшіне ие (170 Нм), беріліс қорабы 180 Нм моментке шыдайды. Компания беріліс қорабының өндірушісі туралы ресми ақпарат бермеді, бірақ инсайдерлердің айтуынша, көлікке Қытайдың бапталған WLY CVT18 агрегатын орнатады.

Қуатты қозғалтқышқа қарамастан, динамика жағынан екі педальді «Веста» механика қорабы бар 90 және 106 ат күшіне ие түрленімдер арасына жайғасты. Седан алғашқы жүздікті 11.6 секундта еңсерсе, Vesta SW Cross 12.7 секундта алады. Максимал жылдамдық — 181 және 174 км/сағ. Вариатор орнатқан нұсқа көп отын тұтынады. Аралас циклде 100 шақырымға 7.7 литр кетеді. АВТОВАЗ автомобиль өндірісін қыстың аяғында бастағанын хабарлады.