Үздік он күштік құрылым тізімінде тек бір дәстүрлі қозғалтқыш бар

Жыл сайын ең жақсы күштік құрылымдарды анықтайтын беделді Wards Auto басылымы 2025 жылғы рейтингті жариялады. Ондыққа енген агрегаттардың тоғызы гибрид немесе толық электрлі жүйе болып шықты, ал классикалық мотор біреу-ақ. Мұндай жағдай 31 жылда алғаш тіркеліп отыр.

Сынаққа қатысқан сұйық отын тұтынатын моторлардың ішінен Wards Auto сарапшылары Chevrolet Corvette ZR1-дегі 5.5 литрлік V8-ді ғана ерекше атап өтті. Бұл қазіргі автонарықтағы ең қуатты қозғалтқыштардың бірі, турбоүрлемді мотор 1064 ат күшін және 1132 Нм момент береді.

2025 жылы мықтылар қатарына қосылған гибридтер түрлі маркаға тиесілі. Оған 4.4 литрлік V8-ге негізделген BMW жүйесі (M5-ке орнатылады), Ford F-150-дегі 3.5 литрлік электрленген V6, гибрид Honda Civic-тің 2 литрлік төрттігі, 3.4 литрлік V6-ға негізделген Lexus LX700h жүйесі және электромотормен жұптасқан 3 литрлік Mercedes-Benz қозғалтқышы (Mercedes-AMG E53) кірді.

Электрокарларға келсек, 2025 жылы басылым Dodge Charger Daytona, Ioniq 9 бен Lucid Gravity кроссоверлері және Nissan Leaf-тің күштік құрылымын үздік деп таныды.

Биылғы іріктеу барысында 28 автомобиль сынақтан өтті, олардың жиырмасы электрленген жүйемен жабдықталған. Қозғалтқыш көлемі 5.5 литр және 1.6 литр аралығында болды. Мамандар агрегаттарды қуаты мен тартым күші бойынша ғана емес, икемділік пен үнемділік, шу мен діріл деңгейі және тағы басқа көрсеткіштер бойынша бағалады. Тізімдегі орынға баға да әсер етті.

Қазылар алқасы электрленген күштік құрылым инженерлердің шектеулі бюджет жағдайында тамаша нәтижеге қол жеткізе алатынын көрсетеді, ал олардың нарықтағы орны барған сайын нығайып келе жатыр деп мәлімдеді.