УАЗ «буханка» атауын ресми түрде пайдаланады

УАЗ-дың СГР топтамасындағы микроавтобусын немесе фургонын «кірпіш» деу керек еді, өйткені бөлке нанның пішіні әртүрлі болады. Дегенмен халық арасына осылай тарап кеткен. Шанағының бүйірі жұмыр келген көлік ТМД елдерінде танымал нанға ұқсайды.

Бұл модельдің, нақтырақ айтқанда УАЗ-450 сериясының шыққанына жетпіс жыл болыпты, ал УАЗ басшылары енді ғана машинаның бейресми атауын заңсыз көшіруден және пайдаланудан қорғап жатыр. Сол үшін компания Роспатентке өтінім жіберді. «Автопоток» телеграм-каналы хабарлағандай, құжатта «УАЗ Буханка» сөзі кириллицамен және Bukhanka деп латын әріптерімен жазылған. Марка оны шетелде қолдануды көздеп отырған сияқты.

Енді зауыт «Головастик» (УАЗ-дың бортты жүк көлігі), «Таблетка» (жедел жәрдем көлігі) және «Козлик» («Хантер» 3151) деген лақап аттарды патенттейтін шығар.