Toyota жаңа буындағы Hilux-тың тизерін көрсетті

Компания Hilux пикабының сырт келбетін көрсететін алғашқы видео жариялады. Оны компанияның Таиландтағы бөлімшесі ұсынды. Жаңа Hilux осы елде жасалуы ықтимал. Роликте премьераның нақты күні көрсетілген. Бұған дейін тұсаукесер желтоқсанда өтеді деген мәлімет шығып еді, бірақ бренд оны 10 қарашаға жоспарлағаны белгілі болды.

Тизерде модельдің дизайн элементтері көрінеді. Пикап жұмыр кабина, бедерлі капот және жіңішке фара алады. Дизайнерлер артқы шамдарын бұрынғыдай тік, бірақ геометриялық пішінде жасаған. Видеодан жүксалғыштағы қауіпсіздік доғасы мен жаңа дискілер байқалады.

Қазанның ортасында желіде Hilux-тың алдыңғы панелінің суреті тарады. Интерьер архитектурасы Prado, Tacoma көліктерімен бірдей. Салоны жайлы болады. Алдын ала мәлімет бойынша Hilux жаңа TNGA-F платформасына көшпейді, құрылымы өзгермейді. Компания оны жаңартып, заманауи жүргізуші ассистенттерінің кешенін орнату үшін жақсартады.

Мотор гаммасындағы негізгі агрегат — 204 ат күшін (500 Нм) беретін 2.8 литрлік жұмсақ гибрид дизель. Hilux мұндай мотормен Азия нарығына шығады. Басқа елдер үшін толық гибрид түрленімі жасалуы мүмкін. Қазір марка модельдің толық электрлі модификациясын әзірлеп жатыр.