Toyota V6 моторы бар модельдерін сервиске шақырды

Toyota концерні АҚШ-та 3.5 литрлік гибрид емес V6-мен жабдықталған жүз мыңнан астам көлікті сервиске шақырады. Бренд былтыр да сервистік кампания жариялады, бірақ бұл жолы ол жаңа модельдерді қамтиды. Toyota Tundra мен Lexus LX600-ден бөлек, Lexus GX-тің қозғалтқышында ақау болуы мүмкін.

Бөлшекті құрастыру барысында моторға металл жоңқасы түсіп кеткен екен. Бұл ішкі компоненттердің майлануын қиындатады, нәтижесінде күштік құрылым дұрыс жұмыс істемейді, қуаты мен тартым күші төмендейді және уақыт өте келе мүлде істен шығады.

Бұл жолы сервистік кампанияға 2022 жылғы желтоқсан мен 2024 жылғы ақпан аралығында конвейерден түскен 127 мың Toyota Tundra мен Lexus LX600 қатысуға тиіс. Дәл осы модельдердің 2021-2022 жылы шыққан партиясын компания былтыр жазда сервиске шақырған. Қазір 2024 жылғы Lexus GX қосылғандықтан, тізім әлдеқайда ауқымды.

Былтыр Toyota мәселені шешу жолын іздеуге кірістік деді де, артынан ақауы бар-ау деген бірқатар көліктің моторын ауыстырды. Концерн тығырықтан шығудың басқа жолын қарастырып жатқанын айта кеткен жөн, мұны 2026 жылғы қаңтарға дейін біржақты етуге ниетті. Бірақ биыл да бұл іс сервиске барған әр машинаның қозғалтқышын ауыстырумен аяқталатын сияқты.

3.5 литрлік V6-мен жүретін Lexus LX пен GX Қазақстанда ресми сатылады. Біріншісінің ең арзаны 84.5 млн теңге тұрса, екіншісін 58 миллионға алуға болады.