Toyota Қытайда Highlander мен Sienna құрастырады

Toyota Қытай компанияларымен бірлескен жобаларды көбейтеді. Жаңа серіктестер қатарында Xiaomi, Huawei және жергілікті IT стартап Momenta бар. Марка олармен бірге жаңа электрокар жасаумен қатар қазір бар модельдерді жаңартады. Мысалы, гибрид Highlander мен Sienna жарық көреді.

Toyota бесінші буындағы Highlander-ді Қытай тұрғындарының талғамына сай жасайды. Аспан асты елінде гибридке сұраныс жоғары, ал Toyota-ның кейінгі кездегі стратегиясы — күштік құрылымның бірнеше түрін ұсыну. Шанақ дизайны мен интерьер архитектурасы жаңарады. Бірақ марка Highlander-ді қазірше жаңа платформаға ауыстырмайтын шығар.

Кроссовер 2026 жылы жарық көреді. Бір жылдан кейін онымен бір платформаны бөлісетін, күштік құрылым жинағы бірдей Sienna шығады. Toyota онжылдықтың аяғына қарай жаңа Camry шығатынын аңғартты, бірақ ол жайлы толық ақпарат жоқ.

Xiaomi жапон концерніне «интернет заттары» технологиясы бойынша, Huawei жасанды интеллектіге негізделген дыбысты көмекшісі бар медиажүйені дамытумен көмектеседі. Ал Momenta жартылай автономды басқару функциясын жасауға атсалысады. Сондай-ақ FAW-мен бірге жаңа Toyota моделі шығады. Ол электрокар немесе гибрид болады әрі Hongqi платформаларының біріне негізделеді.