Toyota-ның Санкт-Петербургтегі зауыты қайта іске қосылады

Санкт-Петербургтің Шушары ауданында орналасқан бұрынғы Toyota зауыты бұған дейін RAV4 кроссоверін және Camry седанын құрастырған. Ол 2022 жылдан бері бос тұр. Жақында кәсіпорын конвейеріне көліктер қайта тұрады. Бұл туралы «Ведомости» газеті қаланың вице-губернаторы Кирилл Поляковқа сілтеме жасап хабарлады.

Басылымның мәліметінше алаң Senat деп аталатын Ресей маркасының меншігіне өтеді. Aurus-тың премиум седаны осылай аталады, ол да ФГУП «НАМИ» институтына тиесілі. Senat люкс көліктер шығармақшы.

Бренд шетелдік серіктесінің технологияларын пайдаланады. Алғашқы кезеңде екі седан мен бір кроссовер құрастырады. Бірақ Senat-қа қай брендтің моделі негіз болатыны белгісіз.

Шушарыдағы зауыт қайта жұмыс бастап, люкс машина өндіреді деген ақпарат бірінші рет тарап жатқан жоқ. Бұған дейін онда Hongqi-дің өңі өзгерген көліктері жасалады деген сыбыс шыққан, бірақ келіссөз тоқтап қалған көрінеді.