Toyota Land Cruiser қай елде өте танымал

Toyota Land Cruiser 300 — жапон бренді ұсынатын жол талғамайтын көліктер ішіндегі флагман. 2024 жылдың қорытындысы бойынша әлемде автомобильдің 105 700 данасы саудаланған. Мұндай деректі JATO Dynamics сарапшысы Фелипе Муньос берді. Ол LC300 көп өткен елдер жөнінде қызық статистика жариялады.

Көш басында БАӘ емес, Аустралия тұр. Былтыр жасыл континенттің тұрғындары Land Cruiser 300 жанкүйері атанып, бір жылда 13 790 данасын сатып алған. Мұнда Land Cruiser тек 3.3 литрлік турбодизельмен жабдықталады, бағасы 97 990 аустралия долларынан (34.2 млн теңге) басталады.

Рейтингтегі екінші мемлекет — Жапония. Мұнда 13 174 машина өз иесін тапқан. Бренд өз отанында LC300-ді дизельді және бензинді мотормен ұсынады. GR Sport модификациясының бағасы 5.2-8.1 млн иен (19.2–29.7 млн теңге) аралығында.

Үшінші сатыға 12 381 көлік сатқан Сауд Арабиясы жайғасты. Бұл жақта модельдің гибрид нұсқасы да бар. Компания оны биыл маусымда таныстырған. Бағасы — 252 770–428 720 риял (36.2–61.5 млн теңге). Ең қымбаты — 457 ат күшін (790 Нм) беретін гибрид.

БАӘ тізімде төртінші болып тұр. Былтыр дилерлер 9319 көліктің кілтін тапсырған. Одан кейін Оман, Катар, Кувейт, Ирак орналасса тізімді Иордания тұйықтады. Яғни, басым бөлігі Таяу және Орта Шығыс елдер. Сарапшылардың есебінше былтыр саудаланған барлық Land Cruiser 300-дің 59 %-ы осы өңірлердегі халық алған.

2024 жылы Toyota Land Cruiser 300 көп өткен елдер

Тоғызыншы орындағы Ресейді (3682) ерекше атап өткен жөн. Toyota бұл елге 2022 жылдан бері ресми түрде көлік жеткізбейді, бұған Ресей мен Украина арасындағы қақтығыс себеп болды. Соған қарамастан машиналар параллель импорт арқылы кіріп жатыр. Мысалы, БАӘ-де сатылған автомобильдердің бір бөлігі Ресейде жүруі мүмкін.

Былтыр Қазақстанда автосалондар 1063 Land Cruiser 300 өткізді. Модель бізде нағыз бестселлер деу қиын, дегенмен Toyota топтамасында ол Camry мен LC Prado-дан кейін тұр. Қазір ресми дилерлер 4 литрлік атмосфералы қозғалтқышы бар Land Cruiser 300 үшін 48.7–53.9 млн теңге сұрап отыр, дизельді нұсқаның құны — 54.2–55.7 млн теңге. Капот астында 3.5 литрлік бензинді турбомоторы бар экземплярдің бағасы — 59.2–70.9 млн теңге.

Қызық дерек: Қазақстанда қымбат Lexus LX-тің сауда көлемі Land Cruiser 300-бен бірдей. Былтыр автосалондардан 1018 «лексус» және 1063 «тойота» шықты.