BestCarWeb жақында шығатын Toyota Land Cruiser 300-ге қатысты үзік-үзік мәлімет беруін жалғастыруда. Зауытта түсірілген суреттерден соң оның бағасына қатысты ақпарат пайда болды.
Басылым дерегіне сүйенсек, өз отанында жаңа машина алдыңғысынан 500 мыңнан 1 млн иенге дейін (2-4 млн теңге) қымбат сатылады. 3.5 литрлік турбомоторы бар 7 орынды GX нұсқасы Жапонияда 5.3 млн иеннен (21.1 млн теңгеге жуық) саудаланады. Айта кетерлігі, Қазақстанда LC200-дің бағасы ресми сатушыларда 29.8 млн теңгеден басталады.
Land Cruiser 300-дің ZX деп аталатын анағұрлым қымбат түрленімінің құны күштік құрылымына байланысты 8-8.5 млн иен (31.8-33.8 млн) аралығында болады.
Gazoo Racing мамандары жасаған GR-S туралы да айта кеткен жөн. Түрлі опцияларға толы жол талғамайтын көліктің нақты бағасы әзірше белгісіз. Бірақ 10 млн иеннен (39.8 млн теңге) төмен болмайтыны анық.
«Үш жүзінші» Lexus те назардан тыс қалмады. LX 570-дің ізбасары LX 600 және LX 500d индексінде жарық көреді. LC300-бен бір моторды бөлісетін көліктер алдыңғы буыннан 1 млн иенге (4 млн теңге) қымбат сатылады. Машина келесі жылы таныстырылады.
Комментариев: 0