Toyota Fortuner Аргентина, Үндістан, Индонезия, Малайзия, Пәкістан, Оңтүстік Африка, Таиланд, Вьетнам қатарлы сегіз елде шығарылады. Осы елдерге қарап-ақ Hiluх негізінде жасалған жол талғамайтын көліктің қай нарықта көп сатылатынын аңғару қиын емес. Еуропа, Солтүстік Америка, Австралия, Қытай және Жапонияда Surf, 4Runner, Prado секілді барынша жақсы жабдықталған модельдер сатылады. Индонезияда Gazoo Racing мамандары жасаған GR Sport индексті «Фортунер» түрленімінің жарық көруі таңғаларлық жағдай емес. Бұған дейін осыған ұқсас TRD Sportivo моделі шығарылған, әрі 275 миллион халқы бар ірі мұсылман елінде мұндай сәнді машинаны сатып алғысы келетіндер аз болмайтыны сөзсіз.
Машинаның техникалық жағы жергілікті стандартқа сай құрастырылған Fortuner-мен бірдей. Көлік екі түрлі мотормен ұсынылады, 2.7 литрлік бензинді мотор (163 ат күші мен 247 Нм) немесе дизельді мотор (149 ат күші мен 400 Нм). Екеуі де 6 сатылы автоматпен жұмыс істейді, машина тек артқы жетекті болады. Демек барлық өзгеріс сыртқы пішіні мен интерьерінде болса керек.
GR Sport тақтайшасы орнатылған автокөлік сәл өзгертілген бампер, күңгірттелген оптика және қара түсті 18 дюймдік дискімен ұсынылады. Қосымшалар тізімінде жүксалғыш есігінің электр жетегі, салонда қара түсті таза былғары қаптама, 9 дюймдік мультимедиа тачскрині және артқы қатардағы жолаушыларға арналған төбедегі жиналмалы экран, сондай-ақ биікке көтеріліп-түскенде көмек беретін жүйе секілді көптеген пайдалы мүмкіндіктер бар.
Сонда бұл көліктің спорттық сипаты қайда? Шынын айтқанда Toyota Fortuner GR Sport-қа жасалған зауыттық тюнинг — әдеттегі Black Edition ғана.
Айта кетейік, бірінші буындағы Fortuner біраз уақыт (2014 жылдан 2016 жылға дейін) Қостанайдағы «СарыарқаАвтоПром» зауытында құрастырылған. Модель біздің елге ұзақ уақыттан бері ресми жеткізілген жоқ, бірақ оны Kolesa.kz-тен (бағасы 24 млн теңгеге дейін) табу қиын емес.
Комментариев: 0