Toyota-ның Қытайдағы электрлі топтамасы тағы бір эксклюзив модельмен толықты. Тұсаукесері былтыр күзде өткен 5.1 метрлік ірі bZ7 седаны саудаға шықты.
Машинаны Toyota, GAC және Huawei инженерлері бірлесіп жасаған. Сондықтан күштік құрылымынан бастап медиакешен мен электрондық көмекшілер жүйесіне дейінгі көп бөлігінде Қытай технологиясы қолданылған.
bZ7 сырттай марканың өзге батареялы модельдеріне ұқсайды, ал салонында Қытайға арналған көліктерде кездесетін дүниелер көп. Мысалы, алдыңғы панельде 15.6 дюймдік медиакешен дисплейі орналасқан, оның жанында шағын цифрлық аспаптар панелі мен проекциялық экран тұр. Ортаңғы консольде сымсыз қуаттау орны бар. Мамандар барлық орындықты массаж функциясымен жабдықтап, алдыңғы креслолардың арқалығына жиналмалы үстел қойыпты. Сондай-ақ тоңазытқыш орнатқан.
bZ7 278 ат күшіне ие бір электромотор және CALB компаниясының LFP батареясымен жүреді. Аккумулятордың сыйымдылығы — 71.35 немесе 88,13 кВт·сағ, жүріс қоры — 600–710 шақырым.
Автомобильдің бағасы 179 800 юаньнан (12.8 млн теңге) басталады. Лидар жүйесін алған ең үздік 710 Ultra нұсқасы 239 800 юань (17.1 млн теңге) тұрады.
Комментариев: 0