28 сәуір күні Toyota Motor компаниясы бүкіл әлемдегі сату нәтижесін жариялады. Көрсеткіш көз қуантарлық болды. Бір айда 982 912 автокөлік сатылған. Бұл өткен жылғыдан 44 %-ға артық.
Жапониялық автоөндіруші сатылымда ғана емес, көлік құрастыруда да оң нәтижеге қол жеткізді. Наурызда зауыттар 843 393 дана техника шығарды. Бұл 2020 жылдың сәйкес кезеңімен салыстырғанда 32 %-ға көп.
Былтыр коронавирус салдарынан сұраныс төмендеді. Алайда бұл Toyota Motor-дың жетістігін жоққа шығармайды. Өйткені басқа брендтер компонент жетіспей, өндірісті азайтып жатқанда, Toyota керісінше, өндіріс қарқынын арттыра алды.
Компания 2011 жылдан бастап жеткізушілермен жұмыс істеу тәсілін өзгерткен, қазір соның пайдасын көріп отыр. Кезінде жойқын жер сілкінісі мен цунами салдарынан Toyota машина шығаруда күрделі мәселеге тап болды. Соған байланысты компания жеткізушілерден күтпеген үзілістің алдын алу үшін қоймада қор жеткілікті болуын талап етеді.
Комментариев: 0