Төтенше жағдай кезінде көлікпен жүру үшін қандай құжат қажет?

Алматыда негізгі көшелер мен қалаға кіреберісте 13 бақылау бекеті орнатылды. Таңғы 7:00-ден 23:00-ге дейін мегаполиске кіріп-шығуға болады, бірақ барлық машина тексеріледі: құжат, көлік салоны, жүксалғышы және фургоны.

Қала ішінде тексеруді патрульдік жасақ жүргізеді.

Алматыға кіру және қалада жүру үшін жүргізуші мен жолаушыда мына құжаттар болуы керек:

• жеке куәлік;
• жүргізуші куәлігі;
• техникалық төлқұжат (SRTS);
• көлік басқаруға құқық беретін басқа да құжаттар: сенімхат, жол парағы және т.б.

Ал 23:00-ден 7:00-ге дейін қалада жүруге қатаң тыйым салынады.

Полиция Алматыда мемлекеттік нөмірі жоқ машинамен жүргендерге (жүргізуші мен жолаушыларға) қатаң шара қолданады.

Айта кетейік, заң бойынша Қазақстанда тіркелген көлікті тек жеке куәлікпен жүргізуге рұқсат етілген. Полиция басқа ақпаратты интернет арқылы деректер базасынан тексере алатын. Бірақ төтенше жағдай жарияланғаннан кейін елде интернет бұғатталды, құжат тексеруде қиындық болуы мүмкін. Сол үшін жүргізушілер жүргізуші куәлігін алып жүргені жөн.