Tesla саудасы құлдырап жатыр

Tesla-ның модельдік топтамасы ескіріп, Қытай және Еуропа электрокарларымен бәсекеге түсетін жаңа машинасы қалмады. Салдарынан клиент азайып, америкалық марка көптеген жеңілдік жасауға мәжбүр болып отыр, бұл компания кірісіне кері әсер етті.

Қаңтар мен наурыз арасында Tesla-ның табысы 2024 жылдың сәйкес кезеңімен салыстырғанда 20 % төмендеді деп хабарлады CNBС. Таза пайда 2024 жылғы 1.39 млрд доллардан (әр акция 41 цент) 409 млн долларға (әр акция 12 цент) құлдыраған (-71 %).

Tesla табыс азаюына жаңарған Model Y-ды шығару барысында марканың төрт зауытында өндіріс шығыны артқаны себеп болды деп санайды, макроэкономиканың тұрақсыздығы да саудаға кері әсер еткен. Компанияның қор биржасындағы жағдайы мәз емес, жыл басынан бері Tesla акциясы 41 % құлдырады.

Powerwall жобасы аясында электр энергиясын өндіру және сақтау қызметі мен реттеуші несиеден түсетін табыс қана компания шығынын ішінара толтырып отыр. Tesla басшысы АҚШ үкіметіндегі жұмысын қысқартып, өз бизнесіне көбірек көңіл бөлуге ниетті. Өйткені оның саясатқа араласуы маркаға кері әсер етіп, қарсыластарын көбейтіп жіберді.