Қытайда сәуірдегі автомобиль саудасының қорытындысы шықты. CarNewsChina нарықтағы седан мен хетч, кроссовер және минивэн саудасын сараптап, көшбасшыларды атады. Үш сегменттің екеуінде Geely және BYD бірінші орын алды, ал бұрын кроссовер нарығында алда болған Tesla Model Y статусын сақтай алмады.
Қытайдан өзге елде Geely Monjaro деп аталатын Geely Xingyue L сәуірде де, бірінші тоқсанда да ең көп өткен кроссовер атанды. Машинаның сәуірде — 23.6 мың, алғашқы тоқсанда 103.5 мың данасы иесін тапты. Екінші орын BYD Song Plus моделіне бұйырды, бір ай бұрын ешкімге дес бермей тұрған Tesla Model Y үшінші сатыға сырғыды. Үздік бестікке Li Auto L6 мен Toyota Corolla Cross енді.
Жеңіл автомобиль сегментінде Geely Geome Xingyuan үздік деп танылды (36 мыңы өтті). BYD Seagull мен Wuling Hongguang Mini EV екінші және үшінші сатыға жайғасты. Бестікке Xiaomi SU7 мен BYD Qin Plus кірді. Tesla Model 3 сәуірде тізімнің басындағы ондыққа да енген жоқ.
Минивэн сегментінде Denza D9, Toyota Sienna және Voyah Dreamer жоғары нәтиже көрсетті. Бірақ ешбірінің сәуірдегі саудасы 10 мың данадан асқан жоқ.
Аспан асты елінің тұрғындары сәуірде 1.755 млн жаңа автомобиль сатып алған. Сегментке байланысты жылдық сауда өсімі 7–16 % болды, бірақ ай бойынша есептегенде кроссовер таңдайтындар — 10.4 %, седан мен хетчбэк алатындар — 9 %, минивэн мінсем дейтіндер 3.6 % азайған.
Комментариев: 0