Tesla-ның болашағы бұлыңғыр тартып барады

Сәуірдегі сауда нәтижесі бойынша Еуропада Tesla-ның халі нашарлаған. Reuters бірқатар елде соңғы 2.5 жылда болмаған нашар нәтиже тіркелді деп жазды. Мәселен, Швецияда Tesla-ға сұраныс 81 % азайыпты. Мұнда өткен айда небәрі 203 электрокар сатылған.

Tesla-ны жақтырмайтын мемлекеттер қатарында Нидерланд (-74 %), Дания (-67 %) және Франция (-59 %) бар. Жалпы Еуроодақта Илон Масктың машиналарын алатын кісі саны 37.2 % кеміді. Қызығы, электрокар саудасы 28 % өскен.

Агенттік сарапшылары компания жаңарған Model Y-ды толыққанды жеткізе бастаса, марканың танымалдығы бұрынғы деңгейге жетеді деп санайды, алайда қазіргі жағдай жылдық сауда нәтижесіне әсер етеді. Компанияның басына қара бұлт үйірілуіне танымал автоөндірушілер арасында бәсеке артып, Қытай брендтерінің көз ілеспес жылдамдықпен қарқын алуы себеп болып отыр. Анағұрлым озық әрі арзан модель ұсынатын Қытай өндірушілерінің үлесі артып, Tesla-ны ығыстыра бастады.

Компания басшысының саясатқа араласуы да брендке кері әсер еткенін атап өткен жөн. Электрокар алуға ниетті адамдардың кейбірі Илон Масктың саяси ұстанымына қарсы екенін білдіру үшін басқа көлік таңдайды екен. Tesla директорлар кеңесі брендтің беделін көтереміз деп Масктың орнына басқа маман қою мәселесін қарастырып жатыр деген сыбыс тараған, бірақ компания мұны растамады.

Биыл I тоқсан қорытындысы бойынша компанияның кірісі 20 % азайып, акциясының құны 41 % түсті, жыл аяғына дейін оңалмайтын сияқты.