Tesla Model Y жаңарды

Қытайда сынақтан өтіп жатқан Tesla Model Y-дың тыңшылар түсірген суреттерінен кейін компания автомобильдің ресми суреттерін және рестайлинг туралы алғашқы ақпаратты жариялады. Model Y-дың сырт келбеті өзгерді, жүріс қоры ұлғайды және қосымша функциялар алды. Tesla қымбаттаған электромобильді Қытайдағы клиенттеріне наурызда жеткізе бастайды.

1 / 7

• 
• 
• 
• 
• 
• 
• 

1 / 7

Жаңарған Model Y-ды бұрынғы модельден оңай ажыратуға болады. Juniper жобасы аясында дизайнерлер электрокардың алдыңғы бөлігін өзгертіп, еңіс капот, басқа бампер және Cybercab стиліндегі жарық техникасымен жабдықтады. Артқы жағында бренд атауы жанып тұратын «моношам» пайда болды. Компания басқа дискілер, тұтқыр шина және интерьердің бірнеше нұсқасын ұсынады.

Техникалық жағынан аспасы жақсарғаны ғана белгілі. Model Y алғаш рет алдыңғы камера алды.

Model Y Juniper-дің тұсаукесері екі елде бір мезгілде өтті, бірақ Tesla тек Қытайдағы көліктің техникалық сипаттамасын жариялады. Кроссовердің базалық нұсқасы 62.5 кВт⋅сағ батареядан қуат алатын 299 ат күшіне ие қозғалтқышпен жүреді. Алғашқы жүздікті 5.3 секундта (рестайлингке дейінгі нұсқаға қарағанда 0.6 секундқа баяу) еңсереді, CLTC циклі бойынша жүріс қоры 593 шақырымға (шамамен 40 км-ге ұлғайды) жетеді.

1 / 8

• 
• 
• 
• 
• 
• 
• 
• 

1 / 8

Үздік модификация алдыңғысы 186, ал артқысы 254 ат күшін беретін екі қозғалтқышпен және 78.4 кВт⋅сағ батареямен жабдықталады. Алғашқы жүздікті 5.3 секундта (0.7 секундқа жылдам) еңсереді, ал қайта қуаттаусыз 719 км (шамамен 30 км-ге артық) жүріп өтеді. Tesla оны модель тарихындағы ең ұзаққа шабатын Model Y дейді. Электромобильдің максимал жылдамдығы — 201 км/сағ.

Қытайда электромобиль шамамен 5 пайыз қымбаттады. Бағасы 263 500 юаньнан (18.85 млн теңге) басталады, екі моторлы нұсқасы кем дегенде 303 500 юань (21.7 млн теңгеге) тұрады. Сауда басталғанда интерьері жақсарған және ерекше жапсырмасы бар Launch Series нұсқасы шығады.

Рестайлингке дейінгі көліктің ең қуатты және жылдам Performance модификациясы болған, бірақ бренд оның жаңаруына қатысты ақпаратты құпия сақтап отыр.