Tank 300-дің жаңа салоны түсіп қалған видео тарады

Рестайлинг нұсқаның интерьері өзгереді. Оны Қытайдағы дилерлік орталықтардың бірінде түсірілген қысқа видеодан көруге болады деп хабарлады «Китайские автомобили». Көліктің сырт келбеті мен техникалық сипаттамасы сол қалпында қалатын сияқты.

Tank 300 төменгі жағы тегіс және шағын джойстиктері бар спорттық стильде жасалған екі шабақты рөл алады. Алдыңғы панелі де өзгеше. Қазір ортаңғы дисплей панельмен біріккен болса, жаңа модельде оның орнын 14.6 дюймдік жеке сенсорлы экран басады. Домалақ желдеткіштердің орнына көлденең келген жіңішке дефлекторлар орнатылады.

Селекторы рөл колонкасына ауысты, бос қалған орынға сымсыз қуаттағыш жайғасты. Ортаңғы тоннельдегі толық жетекті басқару режимдері мен жүріс электроникасын реттейтін физикалық батырмалар мен реттегіштер өзгерді. Салонның бірнеше нұсқасы болады.

Бұған дейін тыңшылар түсірген суреттерден байқағанымыз, Tank 300-дің танымал сырт келбеті өзгермеген. Рестайлинг тек жаңа радиатор торымен жабдықталуы мүмкін. Мотор гаммасы да бұрынғыдай. Қазақстанда автомобиль 220 ат күшін және 380 Нм момент беретін 2 литрлік турбомотормен сатылады, ол 8 сатылы автоматпен және екі түрлі толық жетек жүйесімен жұптасады. 2025 жылғы машинаның бағасы — 19.4-22.2 млн теңге.