«Халиуллин көшесінен қала шекарасына дейінгі Талғар тас жолын жөндеу» жобасына сәйкес құрылыс биыл екінші тоқсанда басталуға тиіс. Қаладағы бөлік Шығыс айналма жол қиылысынан бастап, Бұқтырма көшесі түйісетін жердегі айналма жолға дейін жаңарады. Қалғанын облыстық жол жөндеушілер Алматы — Талғар — Бәйдібек би тас жолын жөндеу жобасы аясында жалғастырады.
Жол жөнделген соң жылдамдық сағатына 70 километрге дейін жетеді деген болжам бар. Бірақ трасса елді мекендер арқылы өтетіндіктен, стандарт 60 км/сағ, ал жаяу жүргінші өткелдерінде 40 км/сағ болуы мүмкін. Жол алты жолақты болады. Оның ең шеткі оң жақтағы кең жолағымен (ені 4 метр) қоғамдық көлік жүреді. Жоба бойынша Алматы аумағындағы тас жолда бөлгіш жолақ болмайды, себебі жол кең емес, ал оны алты жолақтан артық кеңейту үшін ғимараттарды бұзуға тура келеді. Дегенмен айналма жолайрықтан шығысқа қарай (Талғар бағыты) төрт жолақты болады, ортасына ені 4 метр бөлгіш жолақ жайғасады.
Жұмысшылар трассаның екі жағына тротуар, веложолақ, тұрғын үйлердің ауласы мен қызмет көрсету нысандарына ыңғайлы кіреберіс, 22 аялдама салады және жаяу жүргіншілердің қауіпсіздігін қамтамасыз ету мақсатында қауіпсіз алаңды қоршайды.
Жоба аясында мамандар 1500 жол белгісін орнатады. Олардың қатарында Хан Тәңірі көшесімен түйіскен жерде тұратын ауыспалы ақпараттық белгі бар. Мамандар жолдың кейбір бөлігін қоршап, қиылыстар мен жаяу жүргінші өткелдеріне 13 бағдаршам қояды.
Жұмыс қашан аяқталатыны белгісіз.
Комментариев: 0