Такси жүргізушілері жолаушыларға 2019 жылдың 1 сәуірінен бастап фискалды чек бере бастайды. Бұлай топшылауымызға мереке қарсаңында жарияланған ҚР қаржы министрінің «Салық төлеушілер Қазақстан Республикасының аумағында қызметін жүзеге асырғанда ақшалай есеп айырысулар кезінде деректерді тіркеу және (немесе) беру функциясы бар бақылау-касса машиналарын қолданатын қызмет түрлерін бекіту туралы» № 206 бұйрығына енгізілген түзетулер мен толықтырулар себеп болып отыр.
Бұрында бұл талап Жолаушыларды және багажды автомобиль көлігімен тасымалдау ережелерінің 342-тармағында «такси ақаусыз таксометрмен немесе бақылау-кассалық машинамен жабдықталады» деп көрсетілген болатын. Алайда, «немесе» деген сөз жүргізушілердің таксометрді алмастыратын, яғни тапсырыс алып, тарифтерді есептеп, төлем де қабылдайтын смартфондағы қосымшаны ғана қолдануына мүмкіндік беретін еді. Ал енді олар 1 сәуірден бастап кассалық аппаратты қолдануға міндеттеледі.
Естеріңізге сала кетейік, 2018 жылдың қыркүйегінде шенділер «Яндекс.Такси», Uber, InDriver және т.б. компаниялардың жүргізушілерін ресми қызмет көрсетушілер қатарына қосып, оларды медициналық тексерістен өтуге міндеттеген болатын. Десе де заңнамадағы бұл өзгерістер әлі де қабылданған жоқ.
Комментариев: 0