Subaru жаңа Forester Wilderness-ті ақпанда көрсетеді

Алтыншы буындағы Subaru Forester-дің «жол талғамайтын» Wilderness нұсқасы шығады. Марка бұған дейін модельдің алғашқы тизері мен тұсаукесері 6 ақпанда Чикаго автосалонында өтетінін жариялаған. Ал жақында фототыңшылар жаңа өнімнің сырт пішіні қандай болатынын көретті.

Тизерде Forester Wilderness туралы ешқандай мәлімет болған жоқ, одан бүйірлік айна маңындағы тақтайшаны ғана көруге болады. Ал шпиондық фотодан машинаның алдыңғы жағы жиегінің түсі шанақпен бірдей жаңа радиатор торы, өзгеше бампер және қорғаныс жапсырмасымен ерекшеленетіні байқалады. Кроссовердің клиренсі артып, жаңа дөңгелек дискісімен жабдықталған.

Мұндай Forester алдыңғы буыннан сұсты сырт пішіні, жаңарған трансмиссиясы, қосымша жүріс режимдері және интерьер әрлеуімен ерекшеленеді.

Wilderness АҚШ нарығына арналған стандарт Forester сияқты 180 ат күшіне ие 2.5 литрлік мотормен жүреді, агрегат Lineartronic вариаторы және толық жетек жүйесімен жұмыс істейді. Бірақ мотор гаммасы бензин-электрлі түрленіммен толығуы мүмкін.

Subaru Forester-дің алтыншы буыны алғаш Crosstrek-ке қойылған гибрид күштік құрылыммен жүреді деген ақпарат бар. Кроссовердің капот астында электромотор мен 2.5 литрлік дәстүрлі қозғалтқышы орналасады. Олар бірге 200 ат күшін береді. Компания жүйе механикалық толық жетекті сақтап қалатынын хабарлады, бірақ шағын батарея басқа құрылғымен қуаттауға келмейді.