Subaru жаңа Forester Hybrid пен Wilderness-ті көрсетті

Компания Чикаго автосалонында Forester-дің екі нұсқасын ұсынды. Біріншісі — Forester Hybrid, ол жаңа гибрид күштік құрылыммен жабдықталған. Екіншісі — өзгерген жүріс бөлігімен және сұсты келбетімен ерекшеленетін Forester Wilderness.

АҚШ нарығына арналған бензин-электрлі түрленімі Еуропадағыдан өзгеше. Ол 162 ат күшіне ие 2.5 литрлік атмосфералы мотордан, 118 ат күшін беретін электромотор мен стартер-генератордан тұрады. Жалпы қуаты 194 ат күшіне тең. Электрлі агрегат 1.1 кВт⋅сағаттық литий-ионды батареядан қуат алады. Қозғалтқыштар вариатормен және фирмалық толық жетек жүйесімен жұптасады.

Мұндай Forester электр қуатымен қанша шақырым жүре алатыны белгісіз, бірақ гибрид технологияның арқасында бензинді нұсқадан едәуір үнемді болады. Subaru өкілдері отын тұтыну мөлшері қала ішінде 40 %, аралас циклде 25 % төмендегенін айтты. Жүріс қоры 935 км-ге жетеді.

Гибридтің АҚШ-тағы саудасы көктемде басталады. Бағасы да белгілі. Forester Hybrid төрт комплектацияда сатылады, құны 34 995 — 41 695 доллар (шамамен 18 — 21.4 млн теңге) аралығында болады. Компания бұл кроссоверді Toyota мен Honda-ның осы сегменттегі модельдерінен арзан дейді.

Subaru Forester Wilderness алдыңғы буынына негізделген. Жолсыз жерде жүру мүмкіндігін жақсарту үшін жаңа серіппелер мен амортизаторлар орнатылып, клиренсі 236 мм (гибридте 220 мм) биіктеді. Вариатор төмен берілісте тиімдірек жұмыс істеуге бапталған, ал жүріс режимдері қайта калибрленген. Машина астын қорғайтын панель, сүйреуге арналған ілмекпен жабдықталады, 17 дюймдік дискілері жолсызға арналған Toyo шинасымен қапталған.

Кроссовер жаңа қара бастырық алды, геометриялық сипаттамасы жақсарды. Салоны су өткізбейтін материалмен қапталып, түрлі жапсырма пайда болды. Жабдықтар тізіміне 360 келі жүк көтере алатын рейлингтер кіреді.

Forester Wilderness күзде саудаға шығады, сондықтан бағасы әлі аталмады. Дегенмен 180 ат күші бар 2.5 литрлік оппозит мотормен жүретіні белгілі.