Subaru-дың АҚШ-тағы бөлімшесі Индианадағы (SIA) зауытта Legacy өндірісі тоқтағанын хабарлады. Модельдің тікелей ізбасары болмайды, 36 жылдық тарихы бар Legacy конвейерден біржола түсті. Ал Жапонияда седан өндірісі 2020 жылы тоқтаған.
Компания зауыт бұған дейін жалпы 1.4 млн Legacy шығарғанын мәлімдеді. Бірақ кейінгі кезде сұраныс азайған. Модель 2016 жылы ең көп өтті, сол жылы марка 65.3 мыңнан аса седан сатты. Ал былтыр бұл көрсеткіш небәрі 19 591 дана болды.
36 жылда Legacy-дің жеті буыны алмасып, универсал шанағында да жасалды. Кейін универсал бөлек Outback топтамасына айналды. Subaru осы модель тұсында раллиден әлем чемпионатына толыққанды қатыса бастады әрі бірнеше рекорд орнатты. Атап айтқанда, қозғалтқыш көлемі 2 литрден аспайтын универсалдар арасындағы ең жоғары жылдамдықты (270.5 км/сағ) тіркеген. Сондай-ақ 100 000 шақырымды ең жылдам жүріп өткен машина ретінде FIA Land Endurance Record рекордын жаңартты. Legacy бұл межені 447 сағат 44 минутта бағындырды. Автомобиль орта есеппен 223.4 км/сағ жылдамдықпен жүріп отырған.
Legacy-ден кейін Outback Индианадағы зауыт конвейерінен түседі. Бірақ универсал АҚШ нарығынан кетпейді. Компания модельді Солтүстік Америкаға Жапониядан жеткізеді. Ал SIA зауытында Outback-тің орнын жаңа Forester басады.
Комментариев: 0