Subaru Brat — «Джимханаға» қатысатын жаңа суперкар

«Джимхана» жобасының авторы Кен Блок 2023 жылдың басында жол апатынан қаза тапты, бірақ оның командасы Hoonigan жұмысты жалғастырып жатыр. Олар әйгілі сериалдың келесі эпизодына түсетін жаңа суперкарды көрсетті. Автомобильді Subaru-дың жанкүйері әрі экстремал спортта аты аңызға айналған Трэвис Пастрана тізгіндейді. Ерекше болидке 1978 жылы шыққан Subaru Brat пикабы негіз болды.

Көлік Subaru Brataroo 9500 Turbo деп аталады. Атауындағы 9500 саны қозғалтқыш минутына қанша айналым жасайтынын білдіреді. Hoonigan бұл «Джимхана» тарихындағы айналымы ең жоғары мотор дейді. Vermont SportCar әзірлеген екі литрлік төрт цилиндрлі оппозит мотор 670 ат күшін және 920 Нм момент береді. Ол Sadev-тің 6 сатылы секвентал қорабымен және жарысқа арналған дифференциалы бар толық жетек жүйесімен жұмыс істейді. Brat зауыттан 67 ат күшіне ие 1.6 литрлік мотормен шығатын.

1 / 6

• 
• 
• 
• 
• 
• 

1 / 6

Hoonigan суперкардың аспасы туралы ақпарат бермеді. Дегенмен Brataroo белсенді аэродинамикалық элементтер жинағын алғаны белгілі. Алдындағы жалюзи мен ірі антиқанат трамплиннен секіргенде көлікті бірқалыпты ұстауға көмектеседі. Аэродинамика салондағы климат басқару блогымен реттеледі. Интерьер суреттері жоқ, авторлар пикаптың салоны көміртекті және композит материалдардан жасалған, бірақ түпнұсқаның ретростилін сақтаған дейді.

Шанақ дизайнында винтаж айқын көрінеді. Оны танымал стилист Хайзал Салим (The Kyza) жасаған. Суреттен жоба авторлары «Джимхананың» жаңа эпизодын қайда түсіретінін байқауға болады. Бұл жолы мамандар трюкті Аустралияда орындайды. Aussie Shred деп аталатын эпизодтың премьерасы желтоқсанның басында өтеді.