Өткен аптаның соңында Mercedes-AMG өкілдері Женевадағы автосалонға S65-тің ерекше нұсқасын әкелетінін айтқан-ды. Ол Final Edition деп аталады және 6 литрлік аса қуатты V12 моторына ие S-Class үшін соңғысы болып табылады.
Ал енді германиялықтар S65-тің дәл осы нұсқасының суреттерін жариялап, аз-кем мәлімет берді. Белгілі болғандай, Final Edition-ның тек 130 данасы ғана шығарылады екен. Оларды әдеттегі көліктерден Obsidian Black деп аталатын түсінен ажыратуға болады. Тіпті келте құбырлардың өзін осы түске бояп қойыпты.
Шанағы күңгірт көлікке 20 дюймдік қола дөңгелектер орнатқан және мұндай акцент бампер мен бүйірлік белдемшелерде де бар. Ерекшеліктерінен консольдің орталық бөлігінде орналасқан нөмірлік кесіндіге ғана назар аударуға болады.
Қақпақ астында айтарлықтай өзгеріс жоқ: 6 литрлік V12 бұрынғыдай 621 аттың күші мен 1 000 Нм айналу сәтін беерді. Тек моторист аты жазылған тақтайша Final Edition-де күміс түсті емес, қара түсті.
Mercedes-AMG S65 Final Edition көлігінің бағасы әзірше белгісіз, десе де оның әдеттегі S65 үшін сұралатын 230 мың доллардан қымбат болатыны анық.
Комментариев: 0