Mercedes-Benz пен Geely-ге тиесілі Smart маркасы жаңа модельге арналған тизерді жариялады. Машинаның өзі онда көрсетілмегенімен, суреттерден компания екі орынды сити-карды қайта жасайтынын аңғаруға болады. Ол танымал ForTwo-дың мұрагері атанады.
Кішкентай Smart-тың көлеңкесі бар суреттер оның пішінін көрсетеді. Жаңа өнім бұрынғы екі орынды «смартқа» қарағанда қырлы болады, айқын спойлерімен және алдыңғы бөлігінде сызықтарымен ерекшеленеді.
Электрокардың өлшемі туралы ой түюге де болады. Бір суретте жаңа Smart-тың көлеңкесі ForTwo-дың алдыңғы үш буынынан құралған тізбекті толықтырады, соған қарағанда жаңа нұсқа ірілеу болады. Дегенмен ұзындығы 3 метрден аспайтын сияқты.
Тизерлер үш есікті модельдің атауын да ашып берді. Ең ықшам Smart болса да, ол #2 индексін алады, себебі бірінші нөмір бренд қайта жанданғаннан кейін шыққан алғашқы кроссоверге берілген.
Smart #2-нің дизайнын Mercedes-Benz әзірлейді, ал техникалық жағын Қытайдағы серіктестер қолға алады. Электрокар 2026 жылы Қытай нарығына шығады және Wuling Hongguang Mini EV секілді модельдерге бәсекелес болмақшы, кейін Smart оны Еуропа елдеріне ұсынады.
Комментариев: 0