Сирек кездесетін Bugatti EB112 аукционға қатысады

Сәуірде RM Sotheby’s аукцион үйі Bugatti-дің ең сирек кездесетін модельдерінің бірін сатады. Атап айтқанда, 1990 жылдары брендке Романо Артиоли иелік етіп тұрғанда жарық көріп, сериялық өндіріске шықпай қалған төрт есікті EB112 бәссаудаға түседі.

1987 жылы құрылған Bugatti Automobili S.p.A компаниясының алғашқы моделі — 3.5 литрлік төрт турбокомпрессорлы V12-мен жүретін EB110 суперкары. Бірақ Артиоли бір көлікпен шектелуді жөн көрмей, 1993 жылы EB112 седанын таныстырды.

1 / 19

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 

1 / 19

Джорджетто Джуджароның қолынан шыққан бұл автомобильдің сырт пішіні бұрынғы Bugatti өнімдерін еске салады, ал техникалық жағы EB110-ға ұқсайды. Машина 460 ат күшіне ие (590 Нм) 6 литрлік атмосфералы V12-мен жүреді. Қозғалтқыш 6 сатылы механика қорап және толық жетек жүйесімен жұмыс істейді. Седан алғашқы жүздікті 4.3 секундта еңсереді, ең жоғары жылдамдығы — 300 км/сағ.

Bugatti Automobili S.p.A фирмасы EB112-ні тауар түрінде ұсына алмады, өйткені 1995 жылы компания банкрот болды. Сол кезде өндірушіде бір дайын прототип пен екі аяқталмаған шасси ғана қалыпты. Кейін марканың активін Джильдо Пастор сатып алды.

Кәсіпкердің бастамасымен екі EB112 толық аяқталды. Бизнесмен оның бірін сатып жіберіп, екіншісін жалпыға ортақ жолда жүруге арнап сертификаттап, Монакода тіркеген. EB112 Пастор оған 2015 жылға дейін иелік етті. Машина кейде Монако көшелерінде көзге түсіп қалатын, бірақ небәрі 388 км жүрген.

1 / 15

• 
• 
• 
• 
• 
• 
• 
• 
• 
• 
• 
• 
• 
• 
• 

1 / 15

Қазіргі иесі 2021–2022 жылдары сервиске апарған. Garage des Moneghetti мамандары аспа мен тежеу жүйесін толық жаңартып, жаңа Michelin шинасымен жабдықтады. Ал Lorrtec Race Engines моторын жөндепті.

Жалпы жолда жүре алатын жалғыз EB112 аукционда 1.5–2 млн еуроға өтеді деген болжам бар. Бірақ соңғы баға бұдан асып кетуі мүмкін.